Vodacom M-Pesa Tanzania imetangaza ushirikiano mpya na PayPal utakaowawezesha wateja nchini Tanzania kuhamisha fedha kwa urahisi kati ya pochi zao za PayPal na M-Pesa kupitia M-Pesa Super App; Kama sehemu ya suluhisho pana zaidi la malipo la Kimataifa la M-Pesa, hii inaashiria hatua kubwa mbele katika kupanua upatikanaji wa huduma za kifedha za kidijitali duniani.
Kupitia muunganiko huu, wateja wa M-Pesa wanaokidhi vigezo wataweza kuweka fedha moja kwa moja kwenye pochi zao za PayPal na kutoa fedha kutoka PayPal kurudi kwenye pochi zao za M-Pesa kwa usalama na urahisi, na kurahisisha miamala ya kimataifa kwa wafanyakazi huru, watengenezaji wa programu, watengenezaji wa maudhui, wajasiriamali, wafanyakazi wa vibarua vya mtandaoni na wateja wengine waliounganishwa kidijitali.
Ushirikiano huu unakuja wakati mahitaji yakiongezeka ya suluhisho la malipo ya mipakani yasiyo na usumbufu miongoni mwa Watanzania wanaoshiriki katika biashara za kimataifa, kazi za kujitegemea na huduma za kidijitali. Kwa kuwa sasa utoaji wa fedha kutoka PayPal kwenda M-Pesa unawezekana, hatimaye Watanzania wanaweza kupata mapato yao ya Kimataifa kwa urahisi.
Akizungumzia ushirikiano huo, Kaimu Mkurugenzi wa M-Pesa Tulisindo Mlupilo, alisema ushirikiano huu unaonyesha dhamira inayoendelea ya M-Pesa ya kuwaunganisha wateja na fursa kubwa zaidi kupitia ubunifu na huduma jumuishi za kifedha.
“Uunganishaji wa kidijitali unatengeneza fursa zaidi kwa Watanzania kushiriki katika uchumi wa dunia, iwe kupitia kazi za kujitegemea, biashara za mtandaoni, utengenezaji wa maudhui au biashara zinazovuka mipaka. Kupitia ushirikiano huu na PayPal, tunafanya iwe rahisi kwa wateja wetu kutuma, kupokea, kuweka na kupata fedha kupitia mifumo mbalimbali kwa urahisi zaidi na ujasiri,” alisema Mlupilo.
Otto Williams, Makamu wa Rais Mwandamizi, Mkuu wa Kanda na Meneja Mkuu wa Mashariki ya Kati na Afrika, alisema muunganiko huu unasaidia mwingiliano mkubwa zaidi kwa wateja wanaofanya miamala ya kimataifa ya kidijitali. “Kote duniani, tunaona ukuaji unaoendelea katika biashara ya kidijitali na ushiriki wa kazi za masafa duniani kote. Kwa kuwezesha uhamishaji rahisi wa fedha kati ya PayPal na M-Pesa, kupitia kuunganisha akaunti, ushirikiano huu utasaidia kuunda uzoefu wa malipo ya kuvuka mipaka usio na usumbufu na unaofaa zaidi kwa wateja nchini Tanzania,” alisema Williams.
Wateja wataweza kupata huduma hiyo moja kwa moja kupitia M-Pesa Super App kwa kuunganisha akaunti zao za PayPal na pochi zao za M-Pesa kupitia mchakato wa usajili unaoelekezwa na ulioundwa kusaidia miamala salama na isiyo na usumbufu kati ya mifumo hiyo miwili.
Ushirikiano huu unaimarisha zaidi nafasi ya M-Pesa kama kiongozi katika huduma za kifedha za kidijitali na ubunifu nchini Tanzania, huku ukiunga mkono juhudi pana zaidi za kuchochea ujumuishi wa kifedha na kupanua upatikanaji wa fursa za biashara ya kidijitali.
Maelezo ya ziada kuhusu usajili wa wateja, viwango vya miamala, muda na mwongozo wa huduma yatatolewa kupitia Tovuti rasmi ya Vodacom Tanzania na njia za wateja za M-Pesa.
